Nvidia претстави нова графичка картичка наменета за MOBA игрите. GTX 960 е новиот член на GTX 9xx фамилијата графички картички, и иако има послаби перформанси од GTX 970 и GTX 980, сепак доаѓа со значително намалена цена, вели Verge.
Картичката е наменета за корисниците кои не бараат премногу од игрите, и според Nvidia, фокус за х60 сериите секој пат се играчите на MOBA игрите (DotA, League of Legends) кај кои графичките побарувања се поскромни. Картичката всушност ја рендерира графиката во 4K резолуција, а потоа ја конвертира во 1080р што овозможува креирање на помазна графика во споредба со претходните картички од GTX х60 серијата. Дополнителна предност која за дел од корисниците не е занемарлива, е што картичката ја „движи“ League of Legends со напојување од 30W што може да се користи без кулерите и има супер тивка работа.
GTX 960 доаѓа со поддршка за DirectX 12 кој ќе биде достапен наскоро. Картичката е веќе достапна, а цената која ја препорачуваат од компанијата е 200 долари.
